حمدان وجدعان ومغامرات الرياض >>>من ابداعاتي .. - مجتمع ::. أجــآمـ .:: بعثرة تعانق الآبداع

04-17-2009, 03:47 PM

حمدان وجدعان ومغامرات الرياض >>>من ابداعاتي ..

اتيتكم بخرافه جديده من خرافاتي العجيبه

ويمكن تكون طويله شوي لاكن تحملونـــي ..

نبــــــــــــــداء ..

كان ياما كان من صواريخ الزمان..
كان هناك ولد
اسمه {جدعان}
ويلقب نفسه ب حفيد عنتر
وهو حنطي الوجه ذو كي في غاربه وصابره وتحت الاذنين وهو بعمر الزهور او كالوردة التي واطيها بعير يعني مستحيل يتم تحديد عمره...
وفوقها يحب بنت الشيخ
وكان جدعان يسرح بالبعارين والغنم من الفجر
ويذهب إلى البيت بالليل
وفي احد الايام ذهب الجدعي
إلى الغدير وإذى ببنت الشيخ حبيبته تكلم بجوالها وتنظر إليه
وسمعها من كيلو
وهي تقول
(فديتك وفديت مضاربكم
ياه لو كنت عندنا بالشرقيه كان نتعشا كباب مقلي بالعليا
الطويله)<<يعني مو فاهمه
جدعان طقه الحيا ورجع وهو يفكر وش قصدها من هالكلام ياترا هل هو مدح او سب
لا هذا اكيد غزل
وارهقه التفكير ونام على حجاره تجرح التماسيح
لاكن هو لا عادي..
ودارت الأيام ووجد بنت الشيخ وقال لها
انتي وش قصدك بكلامك ذاك اليوم
قالت
متى ياشبيه الغراب
قال
لا تغلطين ترا انا احبك
قالت
امحق محب
هنا بداء الجدعي بالذرابه
وقال
احب مضاربكم وفديت عليتكم الكبيره
وتعشيت شرقيتكم
وبعدها ابتسم ابتسامه تبكي الحجر
وقالت
اقول تعرف تطس لاوالله اطبع هالكعب على جبهتك اللي كنها ساحة تفحيط
وابتسم جدعان
وقال
ياعلك بعد غنمنا
على باله انها تمدحه
وقالت
حبك جن يا الفاهي
وإذى ب اخيها قادم اليهم
وقال
هلو سستر وت ذس إيز
قالت
ذس إز دونكي بق
وإذى ب الأبتسامه تشق وجه جدعان
ويطرق راسه خجلآ
ويقول
حقيقه احرجتوني بمدحكم
وتركب بنت الشيخ مع اخوها ب البانشي
ويذهبون ولازال جدعان يتحكحك من الخجل
وكبر حب بنت الشيخ في قلب جدعان
وصار كل مايشوفها يبتسم ويصطر الي يمشي بجنبه.
وكبر جدعان
والمفروض انه بهالعمر يصد الغزاة عن القبيله
ولاكن
جدعان لايملك حصان
وذهب إلى حمدان الملقب ب(شراب التتن) والدايح وذلك لدجته المفرطه
وشكا له الحال وعن الحب المحال
وشوقه لركوب الحصان
والدلاخه تقطر من عينيه
هنا اشعل حمدان زقاره وقال له
تدري ياجدعان انك تشبه قوطي الببسي الي شبعان وطي من السيارات ..
قال
افا ليش يا الدايح
قال حمدان
على نعل خلن اكمل كلامي
انتم عندكم غنم وش كثرها
وبعارين وعندك اخوان بعد
ياخي خذ من غنمكم وبيعهن وحط معهن واحد من اخوانك مجانآ
قال جدعان
تخسى تبيني اسرق من اهلي
وقام حمدان ودبجه
ووطى على صابره وفوقها طفى الزقاره بخشمه
وخرج جدعان يبكي وبنفس الوقت يفكر بكلام حمدان
واتضح له ان كلامه صحيح
وطق فوق تحت ورجع بنفس السرعه الي خرج فيها
إلى حمدان وقال انا موافق على خطتك
ومن الغد
خربها جدعان
وسرق من غنم ابوه بمساعدة حمدان
وذهبو
إلى السوق وباعوها
ب10000ريال
وإذى بحمدان يفل ام امها يوم شاف الفلوس
وقال له جهز نفسك بنمشي بكرا لرياض ..
وراح جدعان لأهله وقال لهم توصون شي من الرياض
الأم: واويلي اكيد وليدي استخف
الأخ1: جب لنا كل شي
الأخ 2: جب لنا البيوت الكبيره
الأخت: جب لي رجال ريحته حلوه
الأخ الأصغر: ابي شي احسن من هالخيشه الي عذبتني يقصد حفايظ
جدعان: ههههه <--يعني عنده فلوس ورجال مهم
خلاص ابشرو يا اخواني
وعندها دخل الأب وقال وش عندك ياحرمه تصيحين يقصد الام
قالت شف ولدك وش يبي
وابتسم جدعان ابتسامته المعهوده
وقال بروح لرياض
وقال الأب
قم طس للغنم لاارتكب فيك جريمه..
قال جدعان
ابشر
بس ترا بكرا بروح الرياض
قال الأب
تروح رضمه تدق لهاتك
وإذى بجدعان تدمع عويناته ويخرج من البيت يجري إلى المكان الذي تعود ان يرمي فيه احزانه وهمومه
الا وهو شبك الغنم ..
وبكى جدعان وهو يتدحرج داخل الشبك برومنسيه ليس لها مثيل على الأطلاق..
وبينما هو بهذا الحال
اتاه وجه الفلس حمدان
وجلسو وقاله جدعان عن رد ابوه
وقال حمدان
ياشيخ خله يولي
وعطه سيفون ابو نظره
حنا معنا فلوس وبنروح نفلها بالرياض لاتشيل هم احد ..
وبالفعل اقتنع الدلخ جدعان بكلام حمدان وهربو إلى الرياض
الي ماعمرهم شافوها ولايعرفون احد فيها..
(حمدان وجدعان في حواري الرياض)
وصلو الرياض وعلى طول اشترو سياكل حقة البنقاليه
وراحو يدورون مكان ينامون فيه وماتركو باب بيت إلا طقو عليه وقالو له معنا فلوس ونبي ننام عندكم كاشخين بالفلوس
واخر بيت طقوه طلع لهم خال وجسمه مغطي الباب من كبره
وقالو له نفس العباره
وفهمها خطا
وعصب وجته ام العبيد
وهو يمسكهم ويتوطى ف بطونهم وهم مايدرون وش السالفه
الأكيد صحو وهم ف المستشفى وكل واحد يطالع ف الثاني ويقول مسكين هذا اكيد طايح من الحصان او واطيه بعير
مو عارفين بعض من كثر الضرب الي اكلوه من الخال
وبعد ساعه من التدقيق عرفو بعض
وصار كل الي بالمستشفى
يسمعون صراخهم من الفرحه الي هم فيها
وقال حمدان
تعال حنا وين
رد جدعان
قال مادري
بس أكيد ان ذاك الاكوح يعرفنا وحب يمزح معنا وبعدها جابنا هنا لاكن خساره وينه ماخذا فلوس المسكين ..
هنا اشتغل عقل حمدان الذي لايعمل إلا عند علوم النصب
خلاص اسكت اسكت لاتقوله وإذى سألك قله ان الفلوس ضاعت يوم تلعب معنا ...
سكتو
وجلس جدعان يداعب خشمه الأسطوري
وحمدان يتابع الفلم العالمي {حب وخيانه } من اخراج وتاليف المبدع شخصيه مستهدفه

وفجأه وهم بهالوضع
دخلت عليهم ممرضه فلبينيه وهم يستحون ومن زود الحيا صارو تحت البطانيه
والمسكينه ساعه تسحب فيهم عشان تعطيهم العلاج
وهم للحين مندسين على بالهم من اهل الخال
وأيست وطلعت وتركتهم
وقامو وهم منحرجين وكل واحد يطالع في الثاني ويضحك
وهم في هالوضع دخل عليهم دكتور مصري
ومعه 3فلبينيات
واول ماشافو الحريم رجعو لوضع الأختباء
والدكتور جلس يكلمهم
يبي يعرف السبب
قال الدكتور
لجدعان
يبني إيه الحركات دي ..؟
انتو خايفين من إيه ..
ولم يسمع الدكتور إلا صوت صفير خشم جدعان
وذهب وسأل حمدان
نفس السوال
وقال حمدان انا ماني خايف انا رجال
بس عيب علينا هذولي اهل المعزب ياخي..
الدكتور
والله مش فاهم حاجه
إيه اللي تبغيه عشان ترفع البطانيه
قال حمدان
طلع الحريم الي معك برا
هنا فهم الدكتور الطلب وقال لفلبينو اطلعو برا
وقال يالله هم خرجو خلاص ..
وتنفس حمدان الصعداء
ولاكن جدعان مازال تحت البطانيه ويال سوء المفاجأه فقد راح جدعان في غيبوبه والسبب ان البطانيه نصها راحة بفمه
وكان الانسداد في خشمه الكبير شي طبيعي لذلك انقطع عنه الاوكسجين ودخل في الغيبوبه القاتله ولاحد درى عنه..
وكان حمدان يقول لدكتور ترا صديقي يحب المزح وتراه خجول حيل
ولاكن هيهات ياحمدان ف جدعان متوسد امها
ولاحظ الدكتور انقطاع صوت الصفير الصادر من خشم جدعان وتوقع ان هناك سبب ...!
وقام برفع الغطى عنه وإذى وجهه ازرق ودموعه تصب
وعرف الدكتور انه مقطوع نفس
وأخذ يضرب على صدر جدعان بقوه ولاكن مافي فايده
وقرر أن يبيع نفسه ويسوي له تنفس اصطناعي
وبالفعل سواها
هنا تذكر حمدان الفلم الي تابعه
وأخذته الغيره والحميه
وقام وشال الأصطوانه الكبيره حقة الأكسجين وخبط الدكتور على راسه وطاح من صيد أمس..
وانصدم حمدان يوم شاف الأبتسامه تشق وجه جدعان
وقال له بصوت عالي
جدعان قم يالخاين قم ياعديم الأحساس<---سامعها بالفلم
وإذى بجدعان يقوم ويقول الله ياخذ هالزلوف ليش تقعدن كنت بأحلا حلم بالدنيا
وغورقت عينا حمدان بالدموع وسالت على خديه ولاكنها تشبه زيت السياره المحروق
وقال
آآآه ياجدعان هذي اخرتها
وقال جدعان وهو مستغرب وش السالفه ليش وش فيه
وبكا حمدان بكائآ عنيف وقال شف الي تحت سريرك تتوقع ليش سويت كذا انا ..
وقام جدعان وشاف الدكتور يسبح بدمائه وطاح مغشي عليه
(والسبب أن جدعان لايحب رؤيت الدماء اطلاقآ وحمدان مايعرف هالشي ابدآ)
هنا زادت الجراح في قلب حمدان بعد ان سيطر الشك عليه
وقرر أن يهرب من المستشفى ولاكن صعب عليه ان يترك جدعان في هذا الوضع وقام بحمله والهروب به من النافذة
ونجح في الهروب
وفي مكان بعيد عن المستشفى استيقظ جدعان ومازال متأثر من منظر الدماء..
وإذى ب حمدان
يقف أمامه ويقول
انت ياجدعان يا أبن الحسب والنسب تسوي كذا ..
حمدان مو قادر يتكلم مصدوم من المنظر للحين
وقال حمدان اسمع ياجدعان انت بطريق وانا بطريق
وراح حمدان يسحب رجليه يبي جدعان يصوت له او يقول شي
لاكن جدعان لايستطيع الكلام
وأراد أن يصرخ ولاكنه لم يستطيع
ووقف حمدان بأخر الطريق ينظر إلى جدعان نظرات الوداع ..
وعاش حمدان أيام عذاب لفراق صديقه العزيز ويقول لنفسه ليته فراق عادي
وضاااااااااااااااااااااااااع حمدان
واصبح يكثر من الدخان
وبشرب الخمر طربان
وفي السرقه والتفحيط فنان
والى دخول السجون عشقان
ولقبوه بأبو حمو ...
أما جدعان
ففي تلك الليلة السوداء التي فارق فيها حمدان
شافوه ناس وكسر خاطرهم شكله وحالته
واخذوه معهم إلى مزرعة
طويل العمر
وجلس عندهم وصارو اصدقاء وصارو ينادونه ب جوجو
وكان النظام في تلك المزرعه كل يومين سهره وطقطقه لصباح..
وضاااااااااااااااع جدعان
وصار يلبس بابا سامحني وطيحني
والشعر سبايسي
والمصيبه أنه سوى عملية تجميل بخشمه الاسطوري
ومن بعد ماكان كنه طفايه صار كنه مسل سيف ...

ودارت الأيام وهم في هذا الحال يعيشون ...
وكان ابوحمو توه طالع من السجن وشفقان لشوارع
وخذاه واحد من اصحابه إلى العليا ودخلو شارع التحليه
ويااااااااااااااااااااااااال محاسن الصدف
وصدق المثل الي قال
مرد الحي يتلاقى ...
كان جدعان او جوجو
يتمشى في نفس الشارع
وشاف حمدان لاكن مو متأكد او بالأصح ماصدق عيونه وأخذ يلحقه ويطالع فيه بتعجب ..!
حمدان طق براسه الشر وفتح الدريشه وقال اقول يابو الشباب
تعال نزلني واركب مكاني ..!
وابتسم جوجو بعد أن تأكد أنه حمدان 100%
وقال وقف على جنب أبيك ..
ووقفو ونزلو من السيارات

وجدعان من الفرحه مو قادر يحكي
واستجمع كل قواه وصرخ بعالي صوته
حمدااااااااااااااااااااااااان
واهتز حمدان بعنفوان وقال
هااااااااااااااااااااااااااااااااااااااااااااه
وقال جدعان
ولوااااااااااااااااااااااااه ماعرفتن ..؟
قال حمدان
وبثقة المشاهير والله لو ذاكرتي مليون قيقا ياولد وبعدين انا ما اتعرف على أشكالك ياكدش ..
قال جدعان ياه يالدنيا كم تغير ولاتتغير ..
حمدان بداء يشك انه جدعان ولاكن مضيعه الخشم ..!
وواصل جدعان كلامه انت وش صار فيك ووين دنياك مع اني عارف انك ماعرفتن للحين
ياالحقود ..
حمدان ساكت مايدري وش يقول لأنه مو متأكد للحين ..
قال جدعان
وش فيك ساكت مو من طبعك وش الي تغير بحياتك من بعدي
جدعان يتعمد أثارته يبي يشوف وش ردة فعله وحاول يواصل فا خانه التعبير وبكا ..!
وعلى طول حمدان تأكد ان الي قدامه جدعان
وحظنه وبكا معه ..
وقعدو ساعه على هالوضع بكا وعتاب بالأحضان ..
وحسو على حالهم
وقال جدعان
حمدان انا طالبك ماتقول لا ابيك تروح معي لشقتي ابي اخذ كل علومك ..
وقال حمدان يالله مشينا بس ابي استأذن من خويي واجيك ..
وراحو لشقه وهناك قفلو الجوالات وجدعان وقف سيارته بالشارع الثاني عشان ماحد يعكر جوهم..
المهم
قال جدعان
تعال ابي اسألك وش سبب ضربك لدكتور وليش تركتن بالشارع ..؟
سكت حمدان شوي وقال انا شفت الدكتور حاط افمه بأفمك ويوم ضربته انت كنت تبتسم وبعدها زعلت تقولي ليش تصحيني من احسن حلم بحياتي
ويوم شفت الدكتور بدمائه فقدت وعيك
ومارضيت تكلمني ..
وجاء براسي انك ...وسكت ...
وضحك جدعان لين طق
وقال لعنبوك انا وين وأنت وين ..
انا كنت منصرع والدكتور كان يسوي لي تنفس اصطناعي ولولا الله ثم هو كان انا ميت وسبب سكوتي انا كنت بصدمه نفسيه من منظر الدم ..
والحلم اللي كنت اقولك ليش تقعدن
كنت حالم أني مع حبيبتي جزيه <--بنت الشيخ
.........
وقزروها سوالف لصباح اليوم الثاني
وكل واحد حكى قصته من تفارقو لين التقو ..
وقررو انهم
يتركون الطريق الي هم ماشين فيه الحين ..
ويسوون مشروع يصير مصدر رزق لهم..
لاكن اول شي يروحون لديره يشوفون اهلهم ...
حمدان وجدعان ومغامرات الرياض >>>من

النهايه ....

تأليف واشراف واخراج
شخصيه مستهدفه ...

افكر انزل لها جزاء ثاني وش رايكم ..؟ حمدان وجدعان ومغامرات الرياض >>>من

pl]hk ,[]uhk ,lyhlvhj hgvdhq >>>lk hf]huhjd >> >>>lk hgvdhq hf]huhjd pl]hk ,lyhlvhj ,[]uhk